حظك كده
مكتوب عليكي تحبي واحد قلبه صدا
لا الفرحة تقدر تنعشه ولا حزن يقدر يرعشه
ولا نكتة حتى تفرفشه ولا حتى خضة
مع إن قلبك من دهب
مكتوب عليكي تحبي واحد قلبه فضة
حظك كده!
كل البنات اللي ف حياتي قبلك
استنوني نمت وغدروا بي
عدي جوابات الغرام اللي ف دولابي
شوفي كام مرة اتغابيت وفتحت بابي
مرة بيضا ومرة سمرا
دي طويلة ودي تخينة
وأردنية ومغربية.
وفيه الروسية، وفيه العجوزة، وفيه الصبية
وفي النهاية الكل برضك غدروا بي
احتمال العجز في
المهم إني خلاص مابقيتش قادر أحب تاني
جسمي نحّس م السهر والانتظار ومن الأغاني
إنتي أجمل واحدة حبتني في حياتي
رقة الكلمة في شفايفك
الخيال اللي محاوطني
ومحاصرني وإنتي غايبة كأني شايفك
العيون المعجزات اللي باخاف أرفع عينيا
يغضب المولى علي
والله ما أنا عارف لي خوف
أنا بابقى خايف ربي ولا بابقى خايفك؟
إنتى بكر
كل حاجة فيكي بكر
الشوارع والمدرج والأماني
جوه منك لسه بكر
أما أنا جيش م الحريم استهلكوني
ياما رقدوا وياما لعبوا وياما سكنوا
فيه إيجار وفيه اللي ملك
وفيه خدتني وضع يد
صبحت حِكر
وإنتي بكر
طب هاينفع؟
عارف إنها مش خطيئتك
إني عيشتي معربدة
بس أعمل إيه؟
حظك كده!
