جوابي ده الاخير ليكي ..

يا معاليكي ..

يا ست الحسن ..

يا سبب الحزن والعلة ..

يا شجرة حسبتها ضلة وطلعت نار ..

مساء الخير على الازهار على خدودك ..

مبنجرحش ومبنسمحش لحد يقول كلام عنك ..

لذلك ثُمّ اما بعد ..

انا الطفل اللي كان ف عنيكي متشعبط ..

يشوفك روحه تتلخبط ..

وقلبه ابن الحرام يضعف ويستعبط ..

كأنك زار وانا الدرويش ..

كأنك غار وانا الحرافيش ..

كأنك كنتي قرش حشيش دخل رئتيني وملاني ..

كأنك دار وانا اللي مليش سوى الدار اللي لماني ..

بغض الجرح مين خان مين ..

ومين قصر مع التاني ..

وغض الطرف عن اسمك وطعم خروجه ف لساني ..

انا مليت من القِصة ..

ومن لعبة خلاص لسة ..

لقيتك غيمة ف حياتي حسبتك مطرة قومت جريت ..

وفجأة لقيت مفيش غير ليل ..

سحابة ضلمة كنتِ انتِ ..

اشوفك ف الوجع بنتي ..

واحسك ارضي وسفينتي ..

وشمس بتملى ليلي شروق ..

مفيش كام يوم لقيتني بفوق ..

واشوف القاتل الفعلي ..

لقيتك ارض متضمش سوى المطاريد ..

وانا عيل بيفتح إيد ..

يشوف خطك على كَفه ..

عنيا عيال اذا بصيتي يتدفو ..

حسبتك أُم بتدور رَحى الأحضان على عيالها ..

لقيتك ماسكة كاتم صوت ..

رصاصك فات وجع جواي ..

وهو يا حلوة يعني الموت بيفرق شكله كان ازاي ..

وهو الجرح للستات ومش لينا ..

ما فيه رجالة بتعيط ..

وف رجالة بتفكر ف عِز الليل ف ناس باعو ..

وفيه راجل اذا فات ف المحيط وجعه ما بيساعه ..

وفي عناوين بتتلخبط ..

وفيه تفاصيل بتتشخبط ..

وفيه اطفال ما يتدولدوش ف مستقبل مجاش قدام ..

وفيه زفة ما بتقومشي ..

وفيه فرحة ما بتدومشي ..

وفيه نغزة ف صميم الروح ..

مادام ف القصة فيه دابح ..

اكيد ف القصة فيه مدبوح ..

ولو كان القتيل راجل ..

ف دمه بيبقى مش بالسهل ..

خسرتي معاه وجود الأهل ..

خسرتي الحضن واللمة ..

خسرتي الضهر والضمة ..

وبكرة هتندمي لما ..

تحسي البرد من دونه ..

ياريتك شوفتي ف عيونه حنان الاب ..

انا الشخص اللي كله عيوب لكن مليان حاجات تتحب

عملت حاجات لاول مرة بعملها

وكملت اغنيات بيكى لاول اكملها

اشمك ريحة وانا ماشي واقول ماشي

اكلم ربنا عنك وجع وهروب

عكستى المشهد المكتوب

مكنش الفيلم دى نهايته

كدة الكاتب لعب فى النص

وفى لزق فى حياتى وقص

وفى تركيب لناس تانية

فى مشهد خارجى مش محطوط انا وانتى مطرة بتغسل الشارع من الاحزان

حضنتيني زمان ومكان وقولتلى مفيش غيرك

وفى لحظة ع ركبي وانا فى ايديا كام وردة ضحكتلى وطبطيلي ع خدى

كانك كنتى بتعدى على قلبي بروح حافية

سكتت دمعة من عيني بالعافية

ضمتك فى عز البرد لاتنى الفيلم بالكامل مفيش ولا لقطة ماسك وردة

طلع فى حاجات تتقص وتتشال من المونتاج واول ما المطر لمسك لقيتك دوبتى فى المكياج

عروسة حلاوة او صورة ملامح فازة مكسورة فى اخر جزء في الذكرى

خسارة تكملى بكرة

يا نور ساطع بيعمى العين مبينورش

انا هفضل كدة عيل ومبيكبرش

وبكرة يجوز تقابلينى فى اى مكان هشوفك وقتها دخان

بقوة ست هعشها فى زمن تانى ولمسة طفل تشبهى متشبهكيس

انا جوايا كان ميت وحابب اعيش

لا هتحول ولا هتلون ولا هرجع من الاول ولا هكتب علشانك شعر هبيعك دون النظر للسعر

مكانك وردة مسقتهاش فدبلت من خريف موجوع

دموعى رصيد بحوش فيه لناس مستهلة منى دموع

وحلمى معاكى من الاول حظيئة لابد اكفرها

رميتك طفل ببرئتة ندم على حاجة وكسرها

يا اوحش حلو كان فيا

يا اطيب شر في النية

كسبت حاجات تسئ ليا وجيه الوقت ان انا اخسرها

كسبت حاجات تسئ ليا وجيه الوقت ان انا اخسرها