Kung alam mo lang kung sino ka sa buhay ko (sana'y marinig mo 'to)

Ikaw ang simula at ang papupuntahan ko (at 'yan ang totoo)

Parang eroplanong papel na hinagis nang malakas

Tangayin sana ng hangin sa landas

Papunta sa aking idol, idol, idol ko na rapper

Ang angas ni idol, idol, idol ko na rapper

May bago si idol, idol, idol ko na rapper

Lahat ay gagawin upang matupad ang pangarap ko na makasama ka

Kahit sa isang kanta

Idol, lodi, 'dol ('dol)

Puwede ka ba na magsampol? (-pol)

O kaya, puwede pa-arbor (-bor)

Ng kanta kahit na love song?

Gustong-gusto kasi kitang makakolabo

Talagang malupit, parang 'di ka na tao

'Di nagtitipid, 'di rin nagigipit

Ang tanong ko lang (idol, puwede pa-picture?)

Sabi ng marami, mabait ka daw, legit ka raw

Marunong magbalik-tanaw

Napapa-"Wow" ako sa kada spit, galaw

Hindi sabaw kapag ikaw nagkakalaw

Natatangay, lahat ay napapasabay

Naglalaway kapag ikaw nagpapanday

Nangangalay ako sa kakapalakpak

Nagagalak na parang may alak sa hapag-kainan

Laging bundat sa kaalaman

Kapag ikaw ang napapakinggan

Sana magkaro'n ng pagkakataon

Na ikaw ay aking malapitan

Magpapapirma sa tagiliran

Ipapatato ko sa 'king pinsan

Nang hindi ka na mabura

Nakatatak ka na sa 'king puso at isipan

Kung alam mo lang kung ga'no kaangas

Kakalabasan ng kanta 'pag tayo nagsama

'Di mo man ako mapansin ngayon

Gagalingan hanggang sa mahanap ang daan

Papunta sa aking idol, idol, idol ko na rapper

Ang angas ni idol, idol, idol ko na rapper

May bago si idol, idol, idol ko na rapper

Lahat ay gagawin upang matupad ang pangarap ko na makasama ka

Kahit sa isang kanta

Mga obra mo'y nasa memorya ko

Kabisa ko lahat ng mga istorya mo

Pati porma, damit, at lonta ay kinokopya ko

Idol, sa 'yo suporta ko

Ikaw ang dahilan kung bakit ginagalingan ko palagi

Sana makasagi sa bahaghari

At dumating ang pagkakataon

Sa kanta tayo ay pagtabihin

Alam ko naman na imposible maganap

Makaharap ko isa sa mga bituin

Sa ngayon, idadaan ko muna sa dasal

Pero sisikapin ko doon makarating

Kahit kulang sasabihin

'Di man ako mapabilang sa pinakamagaling

Ay tutulayin ko't tutuparin

Dahil sa musika mo ay nabago

Pananaw ko bilang tao na laging talo

At kung bibilangin ay 'di matanaw

Kung may bilang pa ba 'ko

Salamat sa inspirasyon

Dahil sa 'yo, nakabangon ako't kumalag

At pumalag sa mga hamong nakaamba

Sa aking paglalayag

At sana dumating ang pagkakataon

Na tayong dalawa ay magkasalo sa awitin

Lahat ay gagamitin, ano man ang sapitin

Wala akong paki maging alalay o alipin (alipin)

Ikaw ang anito ko, ako ang anino mo

Oh idolo, ako'y nakahandang sumunod sa yapak

Papunta sa aking idol, idol, idol ko na rapper

Ang angas ni idol, idol, idol ko na rapper

May bago si idol, idol, idol ko na rapper

Lahat ay gagawin upang matupad ang pangarap ko na makasama ka

Kahit sa isang kanta

Sana madinig mo ang mga nagawa kong awit (kung alam mo lang kung sino ka sa buhay ko)

Ito ay bunga ng paghanga ko sa 'yo at matinding pagkahumaling

Lahat ng oras kong natitira ay sa 'yo ko lang ibinabaling (ikaw ang simula at ang papupuntahan ko)

Kahit na parang ang pagkatao ko ay unti-unti nang kinakain

Ng pagkasabik at pagkalulong ko sa 'yo

Ayaw kang mawala sa mata ko

Gusto ko na mapunta sa tabi mo

Kahit ayaw mong mapunta sa tabi ko

'Di ako mapakali, nagmadali

Nagpadala ng mensahe

Tumawag ako, sinagot sandali

Pero wala namang sinabi

Pagkababa ng telepono

Tila mas lalong tumindi ang kagustuhan ko

Na makita't makasama ka

Para na akong nahihibang

Kaya inalam ko kung saan ka umuuwi't nakatira

Kung saan at kailan ka ulit maiimbita

Kung ayaw ng tadhanang pagtagpuin tayong dalawa

Hindi na 'ko aasa, ako na mismo ang gagawa ng paraan

Kaya tinambangan ko ang iyong tagamaneho sa paradahan

Inantay ko tumalikod bago ko siya bakbakan

Sinuot ko damit niya, sabay upo sa harapan ng sasakyan

'Tsaka ka inabangan

Pagpasok mo sa loob, agad kitang sinarahan

Pinatakbo nang mabilis na parang siga sa daan

Habang tumutunog ang kanta kong 'di mo pinakinggan

Tagal ko na inasam na makasama ka man lang

Ang tangi kong hinihiling, kahit sa isang kanta lang

"Itigil mo na 'to, oh, parang awa mo naman"

Ngayon, ano'ng pakiramdam nang hindi pinapakinggan?

Hindi na 'to mangyayari kung sana pinabayaan mo man lang ako

Na ikaw ay aking makakamayan

Ngayon ay habang-buhay mo 'kong pakikisamahan

Dahil magsasama na tayo hanggang sa kamatayan, idol

Parang eroplanong papel na hinagis nang malakas

Tangayin sana ng hangin sa landas