على كف الامل تبحر سنيني وانتظاري طال
وعيني في مهب الشوق تتحرى مراسيها
مسافات الوصل تبعد وانا في موعدك رحال
ولاني اللي قدر يوصل ولاني قادر انهيها
تعبت من الحنين اللي مخاويني مع الترحال
تعبت اكتب مراسيلي واقول بيوم تقريها
تعبت وما قدرت أقوى تعب فيني يهد جبال
وخفت ابكيك وتطيحي بدمعة يومي ابكيها
على ذكرى مواعيدك و عطرك، رمشك القتال
كلامك ضحكتك همسك تفاصيلك وماضيها
خذاني الشوق ما املك من الدنيا سوى آمال
وانا مَ احتاج .. الا انتي من الدنيا وما فيها
