Жамалың жас көктемнің жамалындай,.

Жүрегің махаббаттың қамалындай.

Қамалындай, қамалындай, еркем-ай

Тамдының тамылжыған әнші аруы,

Лебізің таңның уыз

Самалындай, самалындай еркем-ай.

Ебелектей жел аңсаған,

Көбелектей гүл аңсаған

Келем саған.

Сені ойлап құлазыған құла құмдай,

Заулайды қиял қырдың құланындай.

Құланындай, құланындай еркем-ай

Бұрымың, Мыңбұлақта туған ару,

Сол жердің мың бірінші бұлағындай.

Бұлағындай, бұлағындай еркем-ай.

Ебелектей жел аңсаған,

Көбелектей гүл аңсаған

Келем саған.

Ілінген ғашықтықтың құрығына,

Әнімді құрбан еттім-ай ырымына.

Ырымына, ырымына еркем-ай

Мен қашан сүңгір екем мың бірінші,

Бұлақтай тарқатылған бұрымыңа.

Бұрымыңа, бұрымыңа еркем-ай.

Ебелектей жел аңсаған,

Көбелектей гүл аңсаған

Келем саған.

Ебелектей жел аңсаған,

Көбелектей гүл аңсаған

Келем саған.