العشق في تياره والقلب شبت ناره
والعقل زاد أفكاره والشوق ضيّق بالي
يا نور عيني إسمعني فيك الغلا يجمعني
في شوفتك متعني وإنت الحبيب الغالي
حولك بشر غنوا لك والناس دايم حولك
تعشق حلاك وزولك يضيع به من شافك
محاسنك مزدحمة والحب ما به رحمة
وخصرك مسوي زحمة كل الحلا بأوصافك
عيني تشوف قلبك عطوف
زين الوصوف بعيني
زين الوصوف بعيني
فيك الحلا والرقة وكل شي ماخذ حقه
إلعب معي ع الدقة لبى حلاك الزايد
سلهم برمش عيونك واضحك فديت سنونك
متع نظر مجنونك بالزين دامه كايد
فيك الجمال الباهر خلقة من الله ظاهر
مثل الملاك الطاهر سكن داخل روحي
أنا لوصلك ناوي الموت قلبي هاوي
ما لي دوا ومداوي بس إنت طب جروحي
زينك فريد وحسنك عجيب
إنت الطبيب لروحي
إنت الطبيب لروحي
خدك تقل تفاحة وشفايفك ذبّاحة
والخشم سل سلاحه سيفٍ وسط خدينك
أنت الذي حبيته حلاك يخرب بيته
والقلب لك عنيته دخيل نظرة عينك
فل الشعر لكتوفك خل الجميع يشوفك
مد الدفى بكفوفك للي يموت بحبك
أنثر جمال الغرة وفل الشعر لو مرة
وقلبٍ يحبك سره والطيش لا يلعب بك
قلبٍ هواك جعله فداك
وثق غلاك وحبك
وثق غلاك وحبك
غزال ما بك حيلة مثل القمر في ليله
فيك الحلا تشكيلة رب البشر سوّاها
القلب بسمك صوت كلام ما ينفوت
وفيك المعاني سوت قصه ظهر معناها
حكِّم ضميرك فيني بالشوق لا ترميني
وبالبعد لا تكويني خفف لهب نيرانك
شعري وكل أوصافي تفدا غلاك الصافي
إنت الحبيب الوافي وإنت الوفى عنوانك
قلبك دفاه يشرح وفاه
كلي فداه الغالي
كلي فداه الغالي
