أرسم وهران دهر زمان
سيدي الهوّاري الإشارة
و في مرجاجو حارو العيان
من دادا ايوب للشّرشارة
كان ديفار و كي العبر ميزان
ويفالا و مدوّرة دارة
سيدي امحمّد ڨبّة لحسان
فوڨ ساريج الدّوكارة
و راس العين بين الطّرڨان
مول الدّومة و الحمّارة
من plantaire لا ڨار يبان
زيد الڨدّام لسكاليرا
عڨبة زاباك فوڨ الباسان
نواحي الدّرب و القنطرة
Rue Philippe و Rue des Jardins
و بسترانة للخضارة
جبل منتانيكا حتّى المكان
عسّاس على باب الجيّارة
طريڨ وجدة و طريڨ تلمسان
بويويو عند الرّاكس ڨارا
طريڨ الكمين غير الألوان
و الطورو و باب الحمراء
شوبو مساميه بن نعمان
و السنوسي و الڨبّة الخضرة
"""""
بيتي و مرافال جنان
واد مرسيلو و الصبّارة
بولونجي و معيز ميريڨوان
ڨراج الرّيفي ذيك الصفراء
هوّد للكرطي ساليڨان
ينعرفو بالشّاشية حمراء
لو باري قدّامه سيلفان
امّالين العطور و الفخّارة
عنتر مول الكسوة و الكتّان
صنادل و صبابيط عند بوجارة
زوج سبوعة عند البيبان
و فالسّاحة مول الصوّارة
قهوة حبيش قهوة عربان
في جنبها قاعة الكاميرا
قهوة الغالي و مول الدخّان
و الوداد جاية من الدّورة
ڨارڨينطا رفيقي و اخوان
و الرّومية و العودة الصفراء
للبلاطو من ثم طلع نيشان
سيدي البشير و المقبرة
في دار العجب كل فنّان
معاها تفتيش الخبراء
مدرسة الفلاح للقرآن
تفسير الآية و السورة
روح و انزل حتّى مول البرنان
تبان الطّحطاحة نوّارة
و القهاوي ضاوية بالشُجعان
و كلّ أنواع التّجارة
و الكاليشات في كلّ مكان
للأفراح ولّا للزّيارة
ليزمو ڨناوي مع كاسان
فريق عرب ضد النصارى
موسى و فن فنون في الميدان
و بوجلال يربّح مباراة
بختي و بلعيد هذوك اثنان
و المصيبح شبّاك الجرّارة
و ليطوال نور أفريكان
رحّال قايدها بالصّفارة
في سيدي بلال تلڨى الشبّان
زاهيين بايتين سهارى
براريد مستّفة و الكيسان
عند بوشعّالة و عمّارة
و التّازي هذاك اللبّان
خيار الحليب نتاع البڨرة
طريق الصيّاغة و بن جمال
حمر العين و الجوهرة
دارنا مشهورة فالكاران
بسنيواتها فوّارة
فوق سيدي عقبة و الرحى جيران
كانو يغسلو الهيدورة
صلناز مع صطاطوان
طابعهم بولفار ماسكارا
سيدي الحسني وعدة و فُرسان
تويجات و كرابن جمّارة
سبّالة الطلبة و عمّي نعمان
حكومة القاضى و الصّمصارة
هذوك ثلاثة صحاب الغيوان
مزهيين حُضّارة الڨصرة
بن يمينة و سي احمد فنّان
و هرنادو يدير في الشكارة
جنان شاطو غير فلان و فلان
و ڨباله تشوف الدّارة
و الحمري اولاده ڨدعان
Avenue de Lamur للصّحارة
طريق اللّوز و طريق الحسيان
الرّي رواز و بو ڨندورة
و من سبّالة بوزيان
لمديوني مول الشّجرة
ڨمبيطة و مع سانتوجان
و فالبركي تلڨى البحّارة
و بتيلاك هذا منين كان
بالشّجعان اصحاب الشّفرة
هاذي وهران كان يا مكان
ڨالو عليها شيوخ و شعراء
يتفاجى فيها اللّي غيضان
و عمر ضيفها ما يڨعد برّا
أبواب معروفة في كل مكان
باسم الباهية ياك مشهورة
فيها الهناء و فيها الامان
تعجب بزّاف في النّظرة
