Tu mere ghar aati hai
Taqleefein mar jaati hain
Teri agan me tape meri saanein
Tere jaane pe thand badh jaati hai
Mere saal bhar ka likha
Tu 2 minute me padh jaati hai
Teri yaadein bhi teri tarah hain
Ye jaati nahi, ad jaati hai
Mai thoda thoda sudhar rahaa hu
Ke tere gham se ubar rahaa hu
Pyar hai tujhse aaj bhi utna hi
Thoda ab khuse bhi kar rahaa hu
Tu aaj bhi balki aur bhi haseen lagti hai
Tu safed libaas me bhi rangeen lagti hai
Tu auron ko lagti hogi aasmaani zaroor
Mujhe toh meri zameen lagti hai
Afeem lagti hai, haalaaki maine kabhi chakha nahi
Sabko bataa dunga tujhse badh kar koi nasha nahi
Main kyun chhupaaun teri khoobiyaan
Khaami toh ye duniya tujhe bataa rahi
Tu chhor gayi, dil tod gayi, mai theek hu ab
Sochta hu ishq karna mai bhi seekh lu ab
Tera hi dil tuney toda, tera hi aashiq tuney chhoda
Isme kya gunaah, mai bhalaa kyun tera chheen lun haq?
Tu ab bhi ghar aaya kar
Mujhe chhu mat, dekh mat, paraaya kar
Par tera kuch toh tha mai, bataaya kar
Jeena chaahta hun, hasaaya kar
Ye adhuri kahaani humaari khoobsoorat banegi
Mere jaise aashiqon ki zaroorat banegi
Kalaakaar chhode hain tuney peeche tere
Inn toote huye dilon se teri moorat banegi
Kuch log pooja karenge
Kuch log doosa karenge
Iss moorat ke neeche maraa kon?
Poochha karenge
- Main
Kuch aur baat karein kya?
Ek tarfa baat koi kabtak karega
Teri qurbat me insaan pehle sa nahi rehta
Ab kya behes, jeeyega? Marega?
Kadva magar asardaar tera jaana neem hi lagta hai
Ye jalte huye geeton ko sunna tera chimni lagta hai
Samay balwaan hai toh main kamzor hu
Tere saath beeta waqt mujhe keemti lagta hai
Tu badal gayaa jitna badal sakta tha
Mai bhi dekhta ke kitna badal sakta tha
Wafaa ki seema nahi aur na bewafaai ki
Kya pataa tha ke itna badal sakta tha
Parindey ishq ke pharpharaaye magar
Zyada se zyada pinjra badal sakta tha
Aadatein badli, kapde badle, lehja badla
Uske liye aur kya badal sakta tha
Ek tarfa mohabbat thi kya hi karte bhalaa
Sirf ek mai hi akela badal sakta tha
Kon bhatke nayi galiyon me bewaqt
Mai chahta to rasta badal sakta tha
Khuda badal na sakaa insaan ko kabhi
Ek insaan hi khuda badal sakta tha
Shayari poori nahi badal paati sanam
Bas aakhiri misra badal sakta tha
Lo, Badal diya
Ab aur nahi sunaaunga
