तोच चंद्रमा नभात तीच चैत्रयामिनी
एकांती मजसमीप
तीच तूहि कामिनी तीच तूहि कामिनी !
तोच चंद्रमा नभात
नीरवता ती तशीच धुंद तेच चांदणे
छायांनी रेखियले चित्र तेच देखणे
जाईचा कुंज तोच तीच गंधमोहिनी
एकांती मजसमीप
तीच तूहि कामिनी तीच तूहि कामिनी !
तोच चंद्रमा नभात
सारे जरि ते तसेच धुंदि आज ती कुठे ?
मीहि तोच, तीच तूहि, प्रीति आज ती कुठे ?
ती न असता उरात स्वप्न ते न लोचनी
एकांती मजसमीप
तीच तूहि कामिनी तीच तूहि कामिनी !
तोच चंद्रमा नभात
त्या पहिल्या प्रीतीच्या आज लोपल्या खुणा
वाळल्या फुलांत व्यर्थ गंध शोधतो पुन्हा
गीत ये न ते जुळून भंगल्या सुरांतुनी
एकांती मजसमीप
तीच तूहि कामिनी तीच तूहि कामिनी !
तोच चंद्रमा नभात
