دشتِ تنہائی میں، اے جانِ جہاں، لرزاں ہیں

تیری آواز کے سائے، تِرے ہونٹوں کے سراب

دشتِ تنہائی میں، اے جانِ جہاں، لرزاں ہیں

تیری آواز کے سائے، تِرے ہونٹوں کے سراب

دشتِ تنہائی میں، دوری کے خس و خاک تلے

کِھل رہے ہیں، تِرے پہلو کے سمن اور گلاب

دشتِ تنہائی میں، اے جانِ جہاں، لرزاں ہیں

دشتِ تنہائی میں...

اٹھ رہی ہے کہیں قربت سے تِری سانس کی آنچ

اپنی خوشبو میں سلگتی ہوئی مدھم مدھم

دور، افق پار، چمکتی ہوئی قطرہ قطرہ

گر رہی ہے تِری دلدار نظر کی شبنم

دشتِ تنہائی میں، اے جانِ جہاں، لرزاں ہیں

دشتِ تنہائی میں...

اِس قدر پیار سے، اے جانِ جہاں، رکھا ہے

دل کے رخسار پہ اِس وقت تِری یاد نے ہاتھ

یوں گماں ہوتا ہے، گرچہ ہے ابھی صبحِ فراق

ڈھل گیا ہجر کا دن، آ بھی گئی وصل کی رات

دشتِ تنہائی میں، اے جانِ جہاں، لرزاں ہیں

تیری آواز کے سائے، تِرے ہونٹوں کے سراب

دشتِ تنہائی میں، اے جانِ جہاں، لرزاں ہیں