Mere ghar se saara sheher dikhta hai
Mere ghar se saara sheher dikhta hai
Maine dekhe hain woh raaste
Jo pahuchaate hain tumhein college
Aur college se ghar
Aur dekha hai tumhara ghar
Jiski chhat pe kapde pasaarte
Tum aati ho nazar
Kabhi khelte hanste
Kabhi rote huye bhi
Kisi garm raat ko
Chhat pe sote huye bhi
Jismein bhi tum ho shaamil
Har wo manzar dikhta hai
Mere ghar se saara sheher dikhta hai
Yahaan ek balcony hai, jisme kursi lagaaye main baitha karta hoon
Tumhein dekhta hoon, dekh ke likhta hoon aur likh ke usko padhta hoon
Padhta hoon jitni baar, likhaai mein kuch kami hi lagti hai
Tumhein panno par sulaane ko meri neendein kayi raatein jagti hain
Kuch khaas hai tum mein
Yunhi nahi ye lekhak kisi par likhta hai
Mere ghar se saara sheher dikhta hai
Mere ghar se saara sheher dikhta hai
Mere ghar se saara sheher dikhta hai
Dikhti hain woh galiyaan, jinse tum gazarti ho
Lagta hai jaise wo galiyaan bhi tumpe marti ho'n
Jis tarah marti hain tumpe ye shaamein
Aur khush hain jaise wo aashiq teri naa mein
Jo karte hain tera peecha saara din
Aur bitaate hain raatein taare gin
Main bhi unme se ek hoon, tum mujhe nahi jaanti ho
Tum apne kanha ke siva kahaan kisi ko maanti ho
Ye saamne jo mandir hai, yahi to maine pehli baar tumhe dekha tha
Tumhari pooja aur ghanti se meri subah khulegi, ye kahaan socha tha
Aur ab to tumhari pooja se pehle hi
Main nazrein tika ke baith jaata hoon
Tum aati ho, chali jaati ho
Main bhi aankhon se tumhein ghar tak chhod aata hoon
Raaste mein jis dukaan se tum kuch leti ho
Bas usi ka saaman-o-dar bikta hai
Mere ghar se saara sheher dikhta hai
Aur bohat sundar dikhta hai, kyunki ismein rehti ho tum
Maine suna hai unn chidiyon se kya kehti ho tum
Jo tumhari chhat pe aate hain
Tumhari baaton ko dauhraate hain
Jo saare sheher mein goonjti hai
Subah shaam mere dimaag me ghoomti hai
Jinko maine likh daala iss kitaab me
Dekho kaisa shaayar likhta hai
Mere ghar se saara sheher dikhta hai
Mere ghar se saara sheher dikhta hai
Mere ghar se saara sheher dikhta hai
Dekho!
