رد عليها بعد خمس ايام كده زن في الموبايل اما زهق منها وقالها ايه
خلاص خلصت؟ وهتعديني بالايام وتستاهلي كده احسن وهتلاقي الي يستاهلك
ما حبتكيش ماحستكيش ولا انت شكل تفكيري ولا تفكيري كان شكلك
زمان قولت اني حبيتك ولو قربتي مش هكلك
وعدي الوقت خلاني احسك تاني شئ عادي
يجوز تتشافي حد لطيف لكن مش ام لاولادي
ومش عيبك ولا غلطك
لكن قفلت وملهاش حل
هترضي تعيشي مع واحد بقلب وقلبه منك مل
وحتي لو انتي قابلاها وهتعديها علشاني
فانا عمري ما هقبلها
واعيش مع واحده لي بتتزل
ما جربتك وقربتك ودربتك علي طباعي
لقيتك سهله مش ناشفه وعملتك دبله في صباعي
واحنا يا حلوه نتكيف من اللي نتوه منوصلهاش
حاجات منروحلهاش جمله لو اشتريناها قطاعي
ساعتها عنيها عندتها وكتمتها وصوتها اتهز
قالتله لو كان في بينا وصال وباقيه ع اللي كان بينا
في اخر حاجه في وصالي كلامك ده كسرهالي
يجوز كان ممكن ابقي عليك وزعلي يطول شويه وقت
يجوز كان ممكن اشتاقلك واشوف الحلو وانت اساءت
لو انت كدبت في كلامك وانا من حبي فيك صدقت
في صدقني انت شئ خلصان وانا من اللحظه دي نسيتك
لو انت شوفتني سهله ومتاحه ومنفعكش حياه فواحد برضوا يشبهلك
محبش عمري يبقي معاه من جاور الرخيص يرخص
وحتي ان سعره كان غالي
مش انت البيت ولا الفرحه ولا الجاي اللي بستناه
طلعت عبيطه كالعاده وعارفه عيوبي ومشاكلي
بتعلق بسرعه بناس لا هما طباعي ولا شكلي
بسامح قد ما بقدر عشان اما امشي مستناش وعقلي كل ما يسامحك يقولي بلاش
هتتاكلي وجازف تاني بشعوري وبرمي الزهر واستني
وقول نارك مسيرها تروح
واشوف من بعدها الجنه
واتاري الطبع فيك غلاب ومهما عملت طبع كلاب
وحكمه ربك ان توجع لكنهاخير
بتاخد شر ناس عنا ومش هحكي في كلام عدي
واقولك اني مظلومه واني مهما كنت اديك
بنفخ قربه مخرومه ما بين الكلمه والافعال
سنين انا بينها مقسومه واديني طلعت اهو ظالماك
فلو يعني هتمشي بلاش تسيب اعذار وجرح وراك
خلاص عادي لقانا نصيب
ولو مكملش برضوا نصيب
محدش مات بجرح حيبب ولا انت في قصتي الجارح
اقولك حاجه هتريح يا سيدي عرفتك امبارح ولا اتعلقت ولا نيله
وبينا رهان علي اللي يحن يبقي اهبل ضعيف حيله
قولت انا عمري ما هسيبك لكن يومها محلفتش
قولت انا ليكي هبقي حياه وضهر وبيت ومعرفتش
قولت انا ابوكي وانا بنتك ودلوقتي مخلفتش وجاي تعيب
خلاص شيلتك ولميتك وحطيتك مع الكراكيب
يجوز ان كنت يوم هزعل يكون علي قلبي اللي اتهان
واني لما متصنتش استنيت دقيقه كمان فاكرني يعني هتشحتف وعيط يوم عليك انت
ده انا الكحل اللي في عنيا يجيب سعرك وحبه كمان
وقفلت السكه في وشه ودخلت وعملت كوبايه شاي بلبن حلوه كده
وكملت المسلسل ونامت
وعجبي
