Jak yah timang

Jak yah tingku aneuk oh tangke hate

Bungong keumang

Dengo intan pesan ayah keu bohate

Beuseumateh

Hate beugleh niet beuget budo meusampe

Ngon syedara

Saleng jaga sama gaseh saboh hate

Pujo Allah aneuk bek tuwo tuwo

Bek sagai lalo tanyoe ngon nikmat donya

Beut beujeumot sikula bek beu oh beu oh

Leupah rugo nyoe tan ilme dalam dada

Teupat but neuk kacok keu pangkai

Meutuah akai pocut tacok keu laba

Hate gleh cok keu seunipat

Suara mangat cok lah neuk keu peunawa

Jak yah gaseh

Bungong puteh gleh beu panyang pike

Sayang sayang

Laku beu timang linggang neuk ban mangat hate

Beumeutuwah

Lam gaseh poma ayah lam sayang bek pre

Jaga marwah

Bek poma ngon ayah tapeusaket hate

Nyoe tamarit aneuk ube ta teupeu

Tapeulaku ube mampu ban tenaga

Bak gop salah bek bagah tapeudong hukom

Yang tan meuphom bek tasambong usong haba

Niet gleh tacok neuk keu pawang

Ceudah akai neuk cok lah keu nahkoda

Hate gleh keu peutunyok alamat

Narit mangat cok keu layeu bahtera