Nağıl danış mənim üçün

Nağıl danış mənim üçün

Asim Bəy Kazımsoy

Qoy mən olum bir uşaq,

Nağıl danış mənimçün.

Yuxuda qucaqlaşaq

Nağıl danış mənimçün.

Yox olmasın, yox, qəti,

Ayrılıq müvəqqəti!

Neynirəm həqiqəti

Nağıl danış mənimçün.

Qəlbimin gülməsinə,

Səni eşq bilməsinə,

Yuxumun gəlməsinə

Nağıl danış mənimçün.

Gedib yaşın izindən,

Öpüm qara gözündən.

Dünyanın hər üzündən

Nağıl danış mənimçün.

Yuxum ərşə çəkilə,

Dan yeriysə sökülə,

Göydən ulduz tökülə

Nağıl danış mənimçün.

Danış ağrıdan, ahdan

Danış savab, günahdan.

Yenə başla sabahdan

Nağıl danış mənimçün.

Olum ev-eşiyində

Dayanım keşiyində.

Soyuqdan üşüyəndə

Nağıl danış mənimçün.

Nə gec olsun, nə ərkən

Tanrı gəl mənə dərkən,

Qolunda can verərkən

Nağıl danış mənimçün...