انا عارفك جدا علي فكره اديك اثبات
في جرح علم جواك من واحد حبيته
في سر جواك مكتوم عمرك ما كتبته ولا حكيته
كان عندك كتكوت اسمه غريب مات وانت صغير ودفنته
وياريتك مت معاه صغير احسن من الهم اللي عنيته
الشله بتعتك وصاحبك اغلبهم راح لما كبرتوا
السهر ان كان بفلوس تغتني من كتر السهر اللي سهرته
ولا منك صاحي تكلم حد ولا منك نايم ومنفض
قاعد بتبرق في الشباك وتعاتب كام شخص خسرته
حبيت واتسبت وقولت خلاص هتعيش مع نفسك ولحالك
مدايق ان مفيش انسان عنده فضول يسأل مالك
الناس بتشوفك شخص كئيب بس ميرضوش يعرفوا طب ليه
شاطرين بس يعتاتبوك وخلاص ويقولوا ايه غير احوالك
خلقك بقي ضيق ومصدع
وبتشرب قهوه مع النيكوتين وزهقت تشيل همك وحدك
فبقيت بتشيل همك وطيق
خرجاتك قلت وصحابك مبقوش يتصلوا فتتأسف
اصلا صحابك لصداعك مبقوش فاضيين
العالم داير من حواليك وانت التفاصيل وقفت حالك
في حاجات بتهم الناس لكن مبقتش حوار بالنسبالك
زي اللمه او طعم الاكل والحب ولبسك وشياكتك
اهملك الكل وفجأه بقيت مرتاح مع فكره اهمالك
انا مش ساحر انا حد يدوب شبهك
فيقيت بوصف حالي
في حاجات بتهم الناس لكن مبقتش حوار بالنسبالي
زي اللمه وطعم الاكل والحب وشكلي وشياكتي
اهملني الكل وفجأه بقيت مرتاح مع فكره اهمالي
زيك بالظبط الناس اللي الشعر نداهم
بيميلوا لناس عايشه معاهم الشعر اللي يحبوا المجاريح
اللي الايام مش حباهم المعتزلين كذب العالم
املا في الجاي يكون احسن بيخشوا الحرب بكل هدوء وبرود وقلوبهم جيباهم
ما صباح الفل ع الدنيا هتخسر ايه يعني زياده
امبارح تؤام من بكره وهي الايام وهي العاده
الحزن ميزاته انك عايش مش خايف تحزن مأنت حزين
ومفيش مقتول هيموت مقتول اخره هيتخربش بزياده
وعجبي
