Io nun capisco, ê vvote, che succede...

E chello ca se vede,

Nun se crede! nun se crede!

E' nato nu criaturo niro, niro...

E 'a mamma 'o chiamma Ciro,

Sissignore, 'o chiamma Ciro...

Séh! gira e vota, séh...

Séh! vota e gira, séh...

Ca tu 'o chiamme Ciccio o 'Ntuono,

Ca tu 'o chiamme Peppe o Ciro,

Chillo, o fatto, è niro, niro,

Niro, niro comm'a che!...

'O contano 'e ccummare chist'affare:

"Sti fatte nun só' rare,

Se ne contano a migliara!

A 'e vvote basta sulo na guardata,

E 'a femmena è restata,

Sott"a botta, 'mpressiunata..."

Séh! na guardata, séh...

Séh! na 'mpressione, séh...

Va' truvanno mo chi è stato

Ch'ha cugliuto buono 'o tiro:

Chillo, 'o fatto, è niro, niro,

Niro, niro comm'a che!...

Ha ditto 'o parulano: "Embè parlammo,

Pecché, si raggiunammo,

Chistu fatto nce 'o spiegammo!

Addó' pastíne 'o ggrano, 'o ggrano cresce...

Riesce o nun riesce,

Sempe è grano chello ch'esce!"

Mé', dillo a mamma, mé'...

Mé', dillo pure a me...

Ca tu 'o chiamme Ciccio o 'Ntuono,

Ca tu 'o chiamme Peppe o Ciro,

Chillo...'o ninno, è niro, niro,

Niro, niro comm'a che!...

Séh! na guardata, séh...

Séh! na 'mpressione, séh...

Va' truvanno mo chi è stato

Ch'ha cugliuto buono 'o tiro:

Chillo, 'o fatto, è niro, niro,

Niro, niro comm'a che!...