يا قمري ودي سلامي للغربة ***
ولي راه غريب مشتاق للأوطان
بلغلوا سلام أرض المحبة ***
الجزائر أمنا عز البلدان
بمدنها بريافها وطن الوجبة ***
بغيابها بشطوطها زينة للألوان
خذ سلام مدونها ليك محبة ***
كل مدينة وناسها في كل مكان
وإذا جيت تزورها يا مرحبا ***
أهلا وسهلا بيك لبلادك مضمان
كي تدخل من حدود تونس العذبة ***
أدخل ع الشطوط وامشي في لامان
أبدا من القالة زينة جذابة ***
واتفرج بالعين في زين المرجان
من بعد امشي للجميلة عنابة ***
واطلع لسيرايدي وانظر لكوان
واتعدى للشطايبي مناسبة ***
واتعشي في سكيكدة زينة للألوان
والطارف والقل في جنة طيبة ***
اتمتع بشطوطهم صيد وعومان
واهبط من ثمة لجيجل في رغبة ***
وانظر لتاريخها من عهد زمان
في المنصورية حوالك تتلبى ***
وادخل لبجاية تعشي في لامان
تيشي بسماها وماها رحابة ***
وبجاية تاريخ راسخ في الديوان
جوز لآزفون شط مع غابة ***
واعقب لتقزيرت ولدلس عجلان
أتمتع بشطوط دلس واتهب ***
واقصد بومرداس من ثمة نيشان
بود واو حذا عين طاية في القربة ***
وأتعافى من بعد في برج الكيفان
***************************
ادخل من بعد لدزاير اللبة ***
زور إمام العاصمة عبد الرحمن
من بعد اطلع زور سكان القصبة ***
وأنا نستناك في عين البنيان
نديك قبالا لموريتي عذبة ***
ونديك لنادي الصنوبر عز مكان
وسطاوالي في الطريق المطلوبة***
والشطر مالوا ذهب للبعد يبان
وقبالوا سيدي فرج مولة القبة ***
واحذاهم زيرالدا شط الأمان
واحذا فوك الدواودة غير قريبة ***
منها نطلع للقليعة زين وشان
ما ننساوش بوسماعيل الرحبة ***
ومزين تيبازة بسياح وسكان
وجبل شنوة فوقها عندو رهبة ***
وقبر الرومية مقابل ربعة أركان
نقصدوا شرشال من بعد الركبة ***
ومن الغمري نزور آثار الرومان
قوراية وسيدي براهم في العقبة ***
زيد تنس وشطها يجلب لحسان
نغدى طول لمستغانم الخصبة ***
ونسمع قصة بن خلوف ومزغران
نقصدوا لآرزيو من بعد الغيبة ***
وندخلوا للباهية مدينة وهران
نظرا لطول الأغنية سوف يتم تنزيلها على مقاطع
وشكرا
