لاجزى الله حمامة فوق الابراج ناحت
أشغلتني ولا أدري وش بلاها تنوحي
سامره ليلها في برْجها ما استراحت
لو هي تندب لها حيٍ لزومٍ بيوحي
ذكرتني ليال بأول العمر راحت
قبل تظهر مغاتير بوجهي تلوحي
آه يا فرصة ضيعتها يوم تاحت
أحسب أن الليالي الممتعه ما تروحي
كبدي اللي تشادي دلةٍ يوم فاحت
سجْ عنها المقهوي فوق جمر يفوحي
رفت العين وأذني خمس مرّات صاحت
وقام قلبي يهوجس بالهنوف الطموحي
ان ذكرته ولو بيديني اوراق طاحت
حيث حبه مشاركني بعقلي وروحي
عنق ريمٍ على عِرْق النفود استضاحت
جفّله مع ضباب الصبح حس السروحي
وعين شيهانةٍ راجت بجٍو وماحت
خمّرن الحباري يوم جتهن تموحي
كل الأسرار ذيك يا ضخيف الروح باحت
وان حكولي بغيرك ماني باسمع ولا أوحي
لاجزى الله حمامة فوق الابراج ناحت
أشغلتني ولا أدري وش بلاها تنوحي
سامره ليلها في برْجها ما استراحت
لو هي تندب لها حيٍ لزومٍ بيوجي
